قصائد في مدح - الربع - الشاص - السفاري - الجمس

بسم الله الرحمن الرحيم
السلام عليكم ورحمة الله وبركاته

هذه من اجمل القصائد اهديها لكل عضو وزائر في منتديات اسير الغرام

نبدأ ..

(( الجيب الربــــع ))


وهني اللي من الطلعه شبع = وراح للمقناص مع قرم العيال
فوق جيب اخر موديلات الربع = فيه خفت دم وفيه خفت ظلال
خطه بجنبه تقل ممخش سبع = ولا توقيع الوليد بن طلال
لا تمقلته تقل غارب ضبع = وان نطحته تقل برق في خيال
تقل بالهويات يقبع به قبع = شوت الدعيع يوم المنديال
يسبع الطلعات بعيونه سبع = لا عطاه اثنين سواقه خيال
هو نعده نادر وغيره تبع = طير شرق جاذبه من راس عال
للمواتر ينتله يطق صبع = ما يرده لا جبال ولا رمال
طابعين العز في خشمه طبع = قوم فوجي لعنبوا هاك الخوال
قيمته بالكاش سبعين وسبع = الف بالدرهم ولا بالريال
يجبع المايع لياوصله جبع = الصلابة بمركبه ماهي خمال
ميزته اخذ من الفز طبع = نمرٍ مرنقط ويلحق له غزال
سايقه ما حط على راسه قبع = ولا رمى طاقيته هي والعقال
ولا مطالعهم بعكاش وضبع = ولا طلعوا نقبين ولا راحوا شمال
بالعلا يشون من رمي الصبع = اربع مطنخ زحازيحٍ رجال
ضابطين الشاي من مي النبع = مع مهاديف الذهب حدب الدلال
ها قولوا رايكم يا هالربع = اسمعو بالله ابسألكم سؤال
هو بأحسن جيب من جيب الربع = جربوا والتجربه خير ومثال



(((((( قصيده في جيب الشاص للشاعر حمود نايف العنزي ))))))

يا لعنبوه الشاص الألفين وأثنيـن
عز الله أن المبدعيـن أبدعـو بـه
تساعدو في صنعه أطلق خبيريـن
باشراف عالم مبتـداه أبتـدو بـه
بروفسـور مخترعلـة براهـيـن
فعله حصانة عن خطـاه ورسوبـه
حصل شهادة علم مع خبرة سنيـن
ولة جائزة نوبل زمـان محسوبـة
من عائلـة بالعلـم دايـم ملميـن
تاريخهـم بالعلـم توارثـو بــه
أبـوه يابانـي سياسـي قوانيـن
في دولته يصـدر نظـام العقوبـه
والأم نازيـة موالـيـد برلـيـن
وخوال خاله من مواريـث كوبـه
صحيح ناقص لأن ماهو على الدين
عالم وعلمـة مـا يكفـر ذنوبـه
أهم أختراعاته على الراس والعيـن
يشكر على أفكارة ودقـة أسلوبـه
أسخر بصنع الجيب من قبل عامين
بالسر حتى دولتـه مـا درو بـه
لين أنتجه وأنتاجه أزين من الزين
رغم أختراع الغـرب تفاجـأو بـه
من جودته له بالصحافه عناويـن
بالسوق ربح كل من تاجـرو بـه
رجـح موازيـن وهبـط موازيـن
كل الدول بالبورصة ساهمـو بـه
نزل من الـدولار بالسعـر ثلثيـن
ودعم رصيد اليـن نوبـه ونوبـه
لاند الكروز اللي تعشقـه ملاييـن
قبل يجـي للشـرق تباشـرو بـه
من دولته جابـه وكيلـه بتأميـن
لدولة آل سعود مـا الفاهـدو بـه
أسعد نفوس اللي لرويـاه شفقيـن
كل دعـا لـه بالجـزا والمثوبـه
أباصفه كله مـن يسـار ويميـن
لو أن في وصفـه عليّـا صعوبـه
بين كما أبو الهول مبنى الفراعيـن
كله حجـر مابـه حديـد وطوبـه
وبين المواتر سكبته تجلـي البيـن
سكبه زعيم ومحتفل فـي خطوبـه
واللون بيج وبويتـه مـن بلاتيـن
ضد الحـرارة والهـوا والرطوبـه
وحَمَار خطه مثل سيـل البراكيـن
والا حَمَار الشمس حـزه غروبـه
وكبوته أنحف من حجم بديَه شوين
ورفارفـه متناسقـه مـع جنوبـه
ونظام دفع الحركـة دفـع تربيـن
فريد من نوعه وهـم طـورو بـه
وماطور صماماته أربع وعشريـن
وبخاخ مصروفـه يقلـل شروبـه
وتحظيرتين أمام وخلاف عكسيـن
وستة عشر جنطة على قـد هوبـه
ومساعدات أربـع وقـدام ياييـن
ودفرنس وفريـول يحـرك كعوبـه
وكوابح آي بي أس تعمل نظاميـن
وبكـل هـوب للكوابـح أنبـوبـه
وونشين سحب ويسحبن وزن طنين
وهزاز يمنع بالصحـاري نشوبـه
وحمولته بالكيلـو ألفيـن وألفيـن
على الشدايد فيه عـزم وصلوبـه
من قوته يصبر على الزين والشين
الطقس ما همـه جليـده وشوبـه
متعـدد الأغــراض للأتجاهـيـن
ما فيه عيب أقول ذا مـن عيوبـه
لأقفى مكوك كـل طقمـه مغاديـن
علم الكواكب والفضـا كلفـو بـه
لأقبل كما الجاكوار والا السقستيـن
في وقت غاره والعدو ولعـو بـه
لأعرض شهاب مرسـل لشياطيـن
ظرب غلاف الجو وأحدث شبوبـه
منوة غريب شـف بالـه بعيديـن
الدرب لو طـول بسرعـة يلوبـه
ما يمنعه لا رمل لا أحجار لا طيـن
غريب ما تمشي المواتـر دروبـه
وأن قلت للسواق يا الأخو من وين
يعطيك علم أرض قفر ما وطو بـه
ما هو زماله عايـلات ووراعيـن
ولاهو زمالـه للعفـون وجلوبـه
سلعـة ثمينـة للرجـال الثمينيـن
راع الولع يشريه لـو بـاع ثوبـه
لوأملكه لـو قيمتـه كلهـا ديـن
أهديـه للـي بالكـرم مجـدو بـه





(((((( قصيدة بالسفاري ))))))


وهمي يالي همني حيل واغرق = حالي وفرح العين مني سرقيا
وقفت تال الليل والخيط ما شق = والدمع من عين المولع غرقيا
اللي تأمل في حياتي وبرق = وشاف الامل في دنيتي ما برقيا
يلقا وشوم الحزن في مهجتي دق = وقليل من عمري هو الي عتقيا
ما بين علم الطافي نق في نق = وما بين علم بالزفير وشهقيا
وما بين سم في حشا الروح يشلق = وحطم خلايا بالوريد ومحقيا
وما بين حزن لاصق الروح والصق = ومن كثر ماهو لاصقن به سحقيا
اجتاحني حزني وغرب وشرق = وانا الاسير الي من العام شقيا
فرقا الونيس اللي فلق حالتي فلق = علمه هدم حالي وموجه صفقيا
بالشدة القصوى وباليوم الامحق = هو العضيد الي له الروح تقيا
عزاه يا قلب بك الهم طبق = وارهش عليك الحزن فوقه نعقيا
وسريت في ليلي مع الجيب الازرق = اللي زراق الليل معهن زرقيا
جيب زرق بالبيد معها تمزلق = اللي لمتاهات الفيافي عشقيا
عشق العشوق الي تعاشق وتعشق = تلقا الرضم من حدر بديه رشقيا
شقاق رشاق الفيافي ليا شق = يشبهن رشاش النياشن مطقيا
جيب على حلو الفيافي تمطق = مع الفجوج الي تعقد نطقيا
جيب سفاري للمساري تدلق = مشيه على غيره بدابها فرقيا
سميته الوافي وهو وافي حق = حقق وانا حققت فيه الحققيا
دايم على خوض الصعيبات يشفق = لا شاف صعبٍ قال ربي رزقيا
عزمه قوي ما عمر يومٍ تعلق = يا شاف حمر النفود فاع انطلقيا
يشبه لشيهان بالجو حلق = يا جاك مهو بشايفن له سمقيا
لا شم راس الطعس ارقب ودنق = والقمه نمره وانتهض وانصلقيا
يكسر عناد النفود حين يتزحلق = في سكته تسفي رمال الحمقيا
لا جا مع الضلعان وقام يتسلق = تقول هذا ما براسه علقيا
يفرح اذا شاف الوعض ويتشقق = قلبه حديد وقلب غيره مزقيا
لا مر طلعات الشباب يتعنفق = يقفى ولا يقفى شبيه الفشقيا
عذروبه انه دايم الدوم يسبق = يبدع جديد يقول منهو لحقيا
حب الوفي مني تملك وغلق = كامل وصوف الكنق فيه انطبقيا
من يركب البترول ما راح يزهق = ولا يعرف التهميز هو والزقيا
في خوة البترول تقسم وتنطق = خوة وفى خوة صويب الشلقيا
ارتسي على كبد المواتر وحرق = من بينهن يشدى لميع البرقيا
الجمس والتايوت والفرد الاخرق = كله مع البترول خاق وخقيا
كنق الصحاري دقدق خشومها دق = دقدق خشوم الي تريد السبقيا
خلاني الجى للخلا واتملق = لان الخلا من واقعي هو نفقيا
حاولت اقاوم لكن الهم حرق = كل الامل واخرس جميع النطقيا






(((((( هذه قصيدة للامير خالد السديري في مدح النيسان ))))))

لاوالله اللي قعد عماش = وجيوب نيسان خلنه
ينخا خوي النشاما شلاش = يشري له الزيت ويحنه
اللاند روفر تنك وخياش = انظار الاجواد عافنة
قرنبع والعيون غراش = الي سرى مايقدنه
ليته يبيعه ولو ببلاش = ويقعد مع الربع بالعنه
احذرك تركب الانترناش = اللى يطبل تقل شنه
من صحبته راكبه ينداش = ومن داخن الزيت يعمنه
والاالتيوتاركوبه لاش = والي مشى صارله حنه
يمشي وكنه بوسط قراش = مكروه مايخلي الونه
ركابه اللي بغير فراش = اصابع الفقر عافنه
الي مشى صابه الهشهاش = ياالله لك الحمد والمنه
والفلفو الجيب بارد جاش = ذنوب راعيه يرمنه
موتر ردي كنه الخفاش = تبطي عيونك يراعنه
مايوالمك والنطاش نطاش = والليل ماهن بيسرنه
وجيوب نيسان خوش قماش = ان ابعد المي يردنه
اسبق من العين بالارماش = بالقيظ في لاهب الكنه
يفرح بهااللي يبي المطراش = الي اوحش القاع يطونه
يصخرن بالهوى الاوحاش = ماطاله الشوف طالنه
اللي عليهن ماينهاش = طريدهن يخلفن ظنه
مشى بنا والكبود عطاش = ماناشت الهجن ناشنه
زارن حماد جنوب خباش = كواسر الطير ماجنه
مضامي ماوطاها اللاش = نباته الريم يرعنه
خليطهن والقطا منحاش = جوازين كنهن هنه
من شاف هاك المها ماعاش = ذبوه مرحوم للجنه
مادوجن في طريب وجاش = مجاهل الرمل داجنه
يوم الصواريخ والرشاش = مراكب الميج يرمنه
اتواجه الهوش بالهواش = يامخلف الدين والسنه
ننبها ماعليها قشاش = مابعّّداليوم يدننه
اصايل مابهن اكداش = ما ذبه الطير ذبنه



((((((مرثية السفاري ))))))

يادمعة هلـيــتها تحت الاغـصان
أبكي علـى فرقـا عشـير غـدا لي

شهرين مرن صـاحـبي ما بعد بان
من يـوم قفّـل ما لقـيـته قـبـالي

ياشين حـالي صرت وحدي وزهقان
تحت الشــجر واقف وأرثي لحالي

في الليل وحشه ما يجيني ولا انسان
وعز الظهر يصلى على القلب صالي

يارفقـة قضيتـها طـول الازمـان
مـع صاحب يرخص علي كل غالي

لا من ذكرت اللي مضى والذي كان
يزيـد فيــني الهــم ويحتاس بالي

مشـوارنا نقطعه في حب واحـسان
كم قـد مشيـــنا من دروب طوالي

وكم قد رقينا من طعـوس وكـثبان
في سرعـتي من شـافـني قال رالي

وكم مـرة يوم المعـاشيب تـزدان
اجلـس معـه الين وقــت الزوالي

والله مـن وداي نزلـته وشـعـبان
مـاهمـني في الدرب طامن وعـالي

عقب المحبـه باعني بارخص اثمان
بـاع الرفـاقـه والأمـل والـدلالي

اول يجـي يمي شفـوق وولهـان
لي غـاب عـني ما يـدوّر بــدالي

يطرب الى من شاف موتـره نيسان
ويمـشـي معه دايم وكنـه ظـلالي

ياهل العقول المنصفه سايقـي خان
كـنت احـسب انه لي رفـيق موالي

ما يـدري انه لي رفيـق بـيابـان
يحـرص علـى ممشـاي اول وتالي

وان كان قلبه قاسـي ما بـعد لان
فـالله يصـبرني علـى مـاجـرالي


وهذه قصيده في مدح الجمس0

قالوا البيم قلت البيم للسلاطين ::::الوا الشبح القار قلت حلاياه
ماشقح قلت الشبح خاطره شين:::::لغاب مس بطن العرق يوما ولاجاه
قالوا الهمر قلت الهمر للشياطين :::::لكن لا جا السهل كلا تعداه
والشاص قلت الشاص جافيه عيبين:::::فيه الشخر ضيق ولجة زواياه
والجمس قلت الجمس مافيه ثنتين::::: منجا يعدرب فيه لاتسع احكاه
اربع ميه حجم المكينه وخمسين::::كمل صفاته صانعه يوم سواه
في البر عند الحر في العسر والين:::::في البرد عند الطرد تعرف سواياه
قلته لأنه فيه من داعج العين:::: عدة مزايا واول الوصف ممشاه
حتى الرفارف شابهت مردف الزين ::::والبويه الي شابهت مبسم اشفاه
واليوم انا خلي اناديه بسمين:::::البهبهاني واسمه الي عرفناه0

وسلمتكم 0

ولكم مني اجمل تحياااتي

قصائد حلوه وجميله
صح لسانك يا أعز الناس
يا مديرنا الفاضل والغالي

أتطلع إلى ما هو كل جديد في هذا المنتدي الشيق